VOCES DE GALICIA

O arquipélago de Cíes, formado polas illas de Monteagudo, Montefaro e San Martiño, é parte fundamental do Parque Nacional Marítimo-Terrestre das Illas Atlánticas de Galicia, o único da nosa comunidade. As súas paisaxes son fogar dunha extraordinaria variedade de vida que se estende desde as profundidades mariñas ata os picos graníticos, na primavera coroados por miles de gaivotas patiamarelas ocupadas en conseguir alimento para os seus pitos. Entre Monteagudo e Montefaro, a praia de Rodas foi destacada como a máis fermosa do mundo.